Pormal nga giablihan niadtong Hulyo 27, 2026 ang lima ka adlaw nga 6th Gov. Lala Simulation Exercise (SIMEX) on Mass Casualty Incident for Vehicular Crash, Earthquake, Landslides, and Flooding Incident sa lungsod sa Banisilan, Cotabato. Ang maong kalihokan, nga gipangulohan sa Provincial Disaster Risk Reduction and Management Office (PDRRMO), gitambongan sa mga first responder gikan sa nagkadaiyang mga lungsod sa probinsya.
Pinaagi sa kompetisyon, gipakita sa mga lokal nga panggamhanan ang kaepektibo, kahanas, ug kaandam sa ilang mga responder sa nagkalainlaing rescue ug emergency response skills, lakip ang emergency transfer, victim management, transport and endorsement, hailing, swift water o river crossing, map reading ug land navigation, low angle rescue, ug triaging.
Sumala sa Probinsyal nga Ehekutibo, gilauman nga pinaagi sa SIMEX mas mapalig-on pa ang kahimtang sa kaandam, koordinasyon, ug kapasidad sa mga unang motubag sa mga emerhensiya sa mga komunidad. Matud pa niya, magsilbi usab kini nga dugang nga pagbansay aron mas mapauswag pa ang kahanas ug kahibalo sa tanang mga partisipante.
Photo Courtesy: Provincial Government of Cotabato
