Nadawat sa Provincial Government sa Davao del Norte ang P44.6 milyon nga pinansyal nga hinabang ubos sa Socio-Civic Projects Fund (SCPF), nga personal nga gitunol ni Presidente Ferdinand Marcos Jr. atol sa “Bawat Bayan Makikinabang” nga programa nga gipahigayon sa Provincial Capitol Compound sa Nabunturan, Davao de Oro.
Sumala sa programa, ang tanang 223 ka barangay sa Davao del Norte makadawat og P200,000 matag usa aron magamit sa pagtabang sa mga presidential scholars ug sa pagpatuman sa mga development projects nga motubag sa nagkalainlaing panginahanglan sa matag komunidad. Gilauman nga makabenepisyo niini ang kapin 1,500 ka barangay scholars sa tibuok probinsya.
Atol sa seremonya, gipasiugda ni Presidente Marcos ang importansya sa lig-on nga panagtinabangay tali sa nasyonal ug lokal nga panggamhanan aron mas epektibong mahatag ang mga serbisyo sa katawhan.
Gidasig usab niya ang responsableng paggamit sa pondo aron masiguro nga magamit kini sa mga angay nga programa ug proyekto.
Samtang, nagpasalamat si Governor Edwin l. Jubahib sa padayong suporta ug pagsalig sa nasyonal nga panggamhanan. Matud niya, dako ang tabang sa maong ayuda sa pagpalig-on sa mga komunidad ug sa pagpauswag sa edukasyon ug kalamboan sa Davao del Norte.
Photo Courtesy: One DavNor Network
