Gipalig-on sa Department of Agriculture–Bureau of Fisheries and Aquatic Resources (DA-BFAR) ang pagpadagahan sa samaral o rabbitfish isip kabahin sa programa aron madiversify ang aquaculture ug madugangan ang panginabuhian sa mga mangingisda ug fish farmers sa nasud.
Sumala sa DA-BFAR, dako ang potensyal sa samaral tungod kay adunay na kini lig-on nga market, angay nga teknolohiya sa pagpadaghan, ug paborito na sa daghang mga Pilipino tungod sa lami ug kapuslanan niini sa nagkalain-laing putahe.
Matud ni DA-BFAR National Director Elizer S. Salilig, pinaagi sa paghatag og teknolohiya ug lig-on nga suporta sa market , posible nga mapadako pa ang produksiyon sa samaral sa tibuok nasud.
Base sa datos sa Philippine Statistics Authority (PSA), misaka ang produksiyon sa samaral gikan sa 153.89 metric tons sa 2021 ngadto sa 361.57 metric tons sa 2025, nga nagpakita sa nagtubo nga potensyal niini isip bag-ong aquaculture commodity.
Gilauman usab sa DA-BFAR nga mapalambo pa ang value chain sa samaral pinaagi sa paghimo niini nga dried, smoked, marinated, deboned, ug ready-to-cook nga mga produkto aron madugangan ang kita sa mga mag-uuma ug mangingisda.
Photo Courtesy: Reefs.com
