Target sa Department of Energy (DOE) nga ipahigayon ug ma-award ang centralized auction para sa mga mid-merit natural gas power plant sa ika-upat nga quarter sa 2026 aron mapalig-on ang suplay sa kuryente sa nasod.
Sumala kang Energy Secretary Sharon Garin, nakig-alayon na sila sa IEMOP ug uban pang ahensya aron maandam ang bidding process nga magpadasig sa pagtukod og mga natural gas plant—mga pasilidad nga mas paspas makatubag kumpara sa coal-fired plants panahon sa peak hours o taas nga konsumo, bisan pa man og mas taas ang gasto sa pagpaandar niini.
Dugang pa niini, gipadali usab sa DOE ang pagpatuman sa mga renewable energy projects pinaagi sa Green Energy Auction 8 nga nakatutok sa Mindanao, ug Green Energy Auction 9 para sa solar-on-stilts ug agrisolar projects.
Aron masiguro ang hapsay nga pag-implementar niining mga proyektong pang-agrikultura ug enerhiya, giandam na usab sa DOE ang gikinahanglang mga kasabotan uban sa Department of Agriculture.
Photo Courtesy: Transformer Magazine
