Patay ang usa ka lalaki human kini gipusil sa wala mailhing suspetsado sa Purok Malipayon 4, NHA, Barangay Dahican, Mati City, Davao Oriental pasado alas 7:15 karung gabii, Hulyo 26, 2026. Sumala sa report, ang biktima giila nga si alyas Edmar, 30 anyos ug residente sa maong lugar.
Base sa inisyal nga imbestigasyon, nakadawat og report ang Mati City Police Station kabahin sa maong pagpamusil ug dali kining girespondihan sa mga duty investigator, SWAT, ug Tourist Police patrollers. Sa pag-abot sa mga otoridad, ilang nakit-an ang biktima nga naghigda na sa yuta duol sa usa ka sari-sari store. Sumala pa usab sa saksi nga si alyas Eleanor, mopalit unta og beer ang biktima sa dihang kalit lang miabot ang wala mailhing suspek ug gipusil kini sa makadaghang higayon nga maoy hinungdan sa iyang hinanaling kamatayon.
Padayon karon ang imbestigasyon sa kapulisan aron mailhan ug madakpan ang suspek. Nakigkoordinar na usab ang Mati CPS sa DOPFU XI alang sa crime scene processing, samtang gipadayon ang hot pursuit ug dragnet operations aron mapadali ang pag-ila ug pagdakop sa responsable sa maong krimen.
