Nagpagawas og bag-ong memorandum ang Bangko Sentral ng Pilipinas (BSP) aron mapalig-on ang depensa sa mga bangko ug ubang institusyong sakop niini batok sa nagkadakong hulga sa artificial intelligence (AI) sa natad sa cybersecurity. Matod sa BSP, ang paspas nga pag-uswag sa AI mahimong gamiton sa mga cybercriminal aron mas dali nilang mailhan ang kahuyang sa mga sistema ug makapahigayon og mas komplikado nga cyberattacks.
Sumala ni BSP Deputy Governor Lyn I. Javier, importante ang lig-on nga cybersecurity aron mapadayon ang pagsalig sa publiko sa pinansyal nga sistema. Giingon niya nga ang mas kusgan nga proteksyon makatabang sa pagpanalipod sa mga konsyumer ug sa pagpalig-on sa kumpiyansa sa nagkalapad nga digital nga ekonomiya.
Ubos sa Memorandum No. M-2026-034, giawhag sa BSP ang mga institusyon nga magpadayon sa updated nga listahan sa ilang digital assets, mogamit og multi-factor authentication, ug momenos sa dili kinahanglang internet exposure. Girekomenda usab ang paggamit sa AI-powered cybersecurity tools alang sa mas paspas nga pag-ila sa hulga, epektibong pagmonitor sa sistema, ug dali nga pagtubag sa mga cyber incident isip kabahin sa kampanya sa BSP alang sa luwas ug responsableng paggamit sa teknolohiya sa sektor sa pinansya.
Photo Courtesy: Philippine News Agency
