Nagpakita og kaisog ug dedikasyon ang Search and Rescue (SAR) Team sa 2nd Sarangani Provincial Mobile Force Company (SPMFC) human malampusong maluwas ug madala sa ospital ang usa ka mabdos nga babaye nga hapit nang manganak taliwala sa landslide sa Purok Bravo, Barangay Upo, Maitum, Sarangani niadtong Hulyo 24, 2026.
Ang rescue team, nga gipangulohan ni PCPT Laurence P. Yadao, Deputy Force Commander, ubos sa pagdumala ni PLTCOL Hoover T. Antonio, Force Commander, mitubag sa insidente diin natabonan sa landslide ang kapin 50 metros nga bahin sa National Highway.
Sa ilang inisyal nga assessment, ilang namatikdan nga delikado gihapon ang lugar tungod sa maluya ug lapok nga yuta nga posible pang mawad-an og pundasyon ug mohunas bisan unsang higayona.
Bisan pa sa dakong peligro, midawat ang grupo og emerhensiyang hangyo aron tabangan ang usa ka mabdos nga babaye nga hapit nang manganak. Walay pagduhaduha nga mitabok ang mga rescuer sa maong delikadong lugar aron luwason ang pasyente ug madala kini nga luwas ngadto sa Maitum Emergency Hospital alang sa gilayon nga pag-atiman medikal.
Sumala sa kapulisan, ang maong operasyon nagpakita sa ilang padayon nga paningkamot sa pagserbisyo ug pagpanalipod sa komunidad bisan pa sa pag-atubang sa peligro ug kalisdanan.
Photo Courtesy: PNP Second Sarangani Provincial Force Company
