Misaka ngadto sa 12.5 porsyento ang taripa nga gipataw sa Estados Unidos sa mga produkto nga gi-eksport gikan sa Pilipinas, sugod gahapong adlawa Hulyo 24, human sa ilang konklusyon nga wala pa mapatuman sa gobyerno sa Pilipinas ang pagdili sa pagsulod sa nasud sa mga produktong gihimo pinaagi sa forced labor o pinugos nga pagpanarbaho.
Ang bag-ong taripa mopuli sa 10 porsyentong buhis nga gipatuman sukad pa niadtong Pebrero, nga natapos na human sa 150 ka adlaw.
Sumala sa Office of the United States Trade Representative (USTR), ang desisyon gibase sa resulta sa imbestigasyon ubos sa Section 301 sa U.S. Trade Act of 1974, lakip ang mga opinyon sa publiko ug rekomendasyon sa ilang mga advisory committee.
Ang Pilipinas usa sa 60 ka ekonomiya nga giimbestigahan, ug usa sa 41 ka nasod nga gipatawan og 12.5 porsyentong taripa. Samtang ang ubang nasod sama sa Cambodia, Indonesia, ug Malaysia gipabiling 10 porsyento lamang ang taripa tungod kay adunay na sila’y balaod o kasabutan nga nagdili sa pag-import sa mga produktong gihimo pinaagi sa forced labor.
Matud ni U.S. Trade Representative Jamieson Greer, ang maong lakang kabahin sa ilang paningkamot aron masumpo ang paglapas sa katungod sa mga mamumuo ug matul-id ang dili patas nga pamaagi sa internasyonal nga patigayon.
Photo Courtesy: CBOS Business Solution Inc.
