Nagpirma ang mga ahensya sa gobyerno og usa ka Joint Administrative Order (JAO) nga nagtakda sa mga lagda alang sa imbestigasyon ug pagdili sa pag-import og mga produkto nga gihimo, sa kinatibuk-an o sa bahin, pinaagi sa pinugos nga pagtrabaho (forced labor).
Ang JAO gipirmahan nila ni Department of Trade and Industry (DTI) Secretary Ma. Cristina Roque, Finance Secretary Frederick Go, ug Department of Labor and Employment Secretary Francis Tolentino didto sa opisina sa DOF sa Manila.
Nagmugna kini og usa ka Inter-Agency Committee nga pangunahan sa DTI, uban sa DOLE isip Vice-Chair, ug ang DOF, Bureau of Customs (BOC), Board of Investments (BOI), ug Philippine Economic Zone Authority (PEZA) isip mga miyembro.
Ang Komite modawat, mosusi, ug mag-imbestigar sa mga reklamo ug impormasyon bahin sa mga gi-import nga produkto nga gidudahang gihimo pinaagi sa pinugos nga pagtrabaho, ug morekomendar og angay nga aksyon ngadto sa mga hingtungdan nga awtoridad.
Ubos sa JAO, ang Bureau of Customs molihok base sa mga nakaplagan ug rekomendasyon sa Inter-Agency Committee ug magpatuman og mga lakang aron idili ang pag-import sa mga produkto nga napamatud-ang gihimo, sa kinatibuk-an o sa bahin, pinaagi sa pinugos nga pagtrabaho.
Kini nga Joint Administrative Order naghatag og mekanismo aron matubag ang mga kabalaka bahin sa mga gi-import nga produkto nga gidudahang gihimo, sa kinatibuk-an o sa bahin, pinaagi sa pinugos nga pagtrabaho.
Ang JAO nahiuyon sa mga obligasyon sa Pilipinas ubos sa internasyonal nga mga kombensyon sa pamuo ug nagtukod og koordinadong mekanismo alang sa imbestigasyon, pagpaambit sa impormasyon, ug pagpatuman sa balaod batok sa mga gi-import nga produkto nga gidudahang gihimo pinaagi sa pinugos nga pagtrabaho.
Gipanalipdan usab niini ang mga konsumidor, mamumuo, importer, exporter, ug lehitimong mga negosyo gikan sa daotang epekto sa dili patas ug mapahimuslanon nga mga pamaagi sa pamatigayon.
Samtang, matod ni Go, ang pagpirma sa JAO nagpakita nga ang Pilipinas komitado sa responsable nga pamatasan sa negosyo, etikal nga pagkuha sa mga produkto o serbisyo, ug mas dakong transparency sa global nga pamatigayon.
Photo Courtesy: istock
