Patay sa nahitabong pagpamusil ang 36-anyos nga lalaking nagbaligya og pan samtang nag-motor didto sa Sitio Salumayag, Barangay Halapitan, San Fernando, Bukidnon Hulyo 23, 2026.
Sumala sa taho ang biktima nakaangkon og samad-pinusilan sa tuong bahin sa iyang lawas, apan gideklarar kini nga dead on arrival pasado alas-3:09 sa hapon sa parehong adlaw.
Sa inisyal nga imbestigasyon nga gipangulohan ni PCPT Gregorio M. Daguno III sa San Fernando MPS, nasayran nga gipara sa 32-anyos nga suspek ang biktima ug sa walay igong rason, kalit lang kining gipusil gamit ang usa ka improvised nga armas.
Gikataho nga sa wala pa ang maong pagpamusil, giingong nag-away ang suspek ug ang iyang asawa hinungdan nga migawas kini sa ilang balay nga puno sa kasuko ug nagpaingon sa dalan diin iyang natagboan ug gipahamungtan sa iyang kasuko ang inosenteng biktima. Pagkahuman paspas nga mikalagiw sa kabukiran ang suspek.
Sa karon nagpahigayon na og hot pursuit ug dragnet operations ang kapolisan kauban ang silingang mga yunit. Gipahigayon usab ang pagproseso sa crime scene sa Bukidnon Provincial Forensic Unit, samtang nagpadayon ang makuting imbestigasyon aron mahatagan og hustisya ang namatay nga biktima.
Photo Courtesy:San Fernando Municipal Police Station
