Gipahibalo sa Department of Agriculture (DA) nga ipalangan ang pagpasulod sa 250,000 metric tons (MT) nga imported nga isda hangtod Oktubre o Nobyembre imbis nga sa buwan sa Agosto, tungod kay igo pa ang suplay sa lokal nga merkado.
Matod ni Agriculture Secretary Francisco Tiu Laurel Jr., ang mas taas nga panahon sa pagpanagat tungod sa El Niño nakatabang sa pagpadayon sa produksiyon ug pagpabiling lig-on sa suplay sa isda.
Dugang niini nga sugdan lang ang importasyon panahon sa closed fishing season diin kasagarang moabot gikan Nobyembre hangtod Pebrero aron maprotektahan ang pagdaghan sa isda sa kadagatan.
Ang Certificate of Necessity to Import (CNI) nga giisyu niadtong Marso nagtugot sa pag-import sa maong gidaghanon aron mapadayon ang igo nga suplay ug malikayan ang pagsaka sa presyo.
Sa alokasyon, 80 porsiyento ihatag sa commercial sector, 20 porsiyento sa mga asosasyon ug kooperatiba, samtang 10,000 Metriko Tonelada igahin alang sa Kadiwa program sa gobyerno.
Lakip sa gitugotan nga i-import ang nagkalain-laing klase sa isda ug seafood sama sa tuna, salmon, sardinas, nukos, hipon, alimango, ug uban pang matang sa isda.
Photo courtesy: Dreamstime.com
