Gilunsad sa Land Bank of the Philippines ug Visa ang Government Purchase Card (GPC) aron ilisan ang papel-based nga cash advance ug reimbursement system sa mga ahensiya sa gobyerno. Pinaagi sa GPC, mahimo nang digital ang pagbayad sa gagmayng kantidad sa mga gastohan sama sa airfare, hotel, car rental, fuel, software ug uban pang awtorisadong paliton. Ang matag ahensiya mahimong magtakda og monthly spending limit gikan sa P100,000 hangtod P5 milyon, ug ang mga dili awtorisadong transaksyon awtomatikong ibalibad.
Sumala sa LandBank ug Visa, makatabang ang GPC sa pagpalig-on sa transparency ug pagmonitor sa paggasto sa gobyerno pinaagi sa real-time tracking ug digital records nga mahimo usab ma-audit sa Commission on Audit (COA). Sa pagkakaron, 773 ka Government Purchase Card na ang na-isyu, diin ang Bureau of the Treasury ug ang 16 ka regional offices niini ang unang migamit sa programa. Target usab sa LandBank nga mapalapad pa ang paggamit niini ngadto sa ubang ahensiya sa gobyerno, LGUs, state universities ug GOCCs.
Photo Courtesy:Philippine News Agency
