Naputol ang pito ka sunod-sunod nga kadaogan sa Cebu Greats human sila gipildi sa Biñan Tatak Gel, 78-77, sa duwa sa Maharlika Pilipinas Basketball League (MPBL) sa Hoops Dome sa dakbayan sa Lapu-Lapu. Nahulog sa 14-4 ang rekord sa Cebu, samtang misaka sa 14-3 ang Biñan ug gipalugway ang ilang winning streak ngadto sa 12 ka duwa.
Nakalabaw ang Cebu, 77-76, human sa tres ni Jun Manzo nga nahibilin pa ang 1:51 sa duwa. Apan gibawi ni Carlo Lastimosa ang labaw pinaagi sa layup gikan sa assist ni Nic Cabañero nga nahibilin ang 1:02, nga nahimong game-winning basket.
Aduna na untag tsansa pa og duha ka higayon ang Cebu aron makadaog, apan wala mosulod ang tres ug ang ulahing jumper ni Kint Ariar. Bag-una sa Biñan si Kenny Rocacurva nga taga-Camotes Island nga adunay 19 puntos, pito ka rebounds ug lima ka steals. Midugang si Cabañero og 14 puntos, samtang si Lastimosa ug Jaymar Gimpayan adunay 12 matag usa.
Alang sa Cebu, si Manzo maoy top scorer nga adunay 23 puntos, samtang si Mark Meneses mitala og 13 puntos, 12 rebounds ug walo ka assists. Mosulay ang Cebu Greats sa pagbangon sa karung adlawa Hulyo 18 batok sa Caloocan Batang Kankaloo sa Cebu Coliseum karung alas-6 sa gabii.
Photo Courtesy:Inquirer
