Sulod lamang sa pipila ka tuig, ang all-female P-pop group nga Baby Dolls nahimong usa sa labing gihisgutan nga mga grupo sa social media ug music streaming platforms. Gikan sa ilang pagsugod isip performers sa “It’s Showtime,” hangtod sa ilang pagdominar sa TikTok ug Spotify, napamatud-an sa grupo nga ang talento, disiplina ug maayong konsepto mahimong moresulta sa usa ka viral nga kalampusan.
Ang Baby Dolls unang gipaila sa publiko niadtong 2023 isip homegrown girl group sa It’s Showtime. Ang mga miyembro niini mao sila Arianne Dela Cruz, Chole Florendo, Johaira Moris, Juby Sabino, Jelai Ahamil, Eriel Reyes, ug Ina Ortega , nga tanan napili gikan sa mga segment sa programa nga “Girl on Fire” ug “Sexy Babe.” Gikan sa orihinal nga siyam ka miyembro, pito na lamang ang nagpabilin sa grupo karon.
Dako ang ilang unang breakthrough pinaagi sa kantang “Ikembot Mo,” ang carrier single sa ilang debut EP nga “ZoomBaby Dolls.” Ang kanta nahimong viral dance craze sa TikTok nga adunay kapin usa ka milyon ka user entries ug misulod pa sa Spotify Philippines Viral Songs Chart. Ang kalampusan niini maoy nagbukas sa pultahan aron mas mailhan ang grupo sa mainstream P-pop scene.
Human sa “Ikembot Mo,” misunod ang “Oohh Lala Baby,” nga dali usab nakakuha og milyon-milyong views ug streams. Ang kanta nailhan tungod sa catchy nga chorus, sayon sundon nga dance steps ug makalingaw nga novelty-pop sound nga dali masundan sa mga bata, kabatan-onan ug bisan mga celebrity. Ang music video niini milapas sa duha ka milyon ka views pipila lamang ka adlaw human sa pagpagawas.
Dako usab ang natampo sa viral nga kalampusan sa kanta ang padayon nga pag-perform sa Baby Dolls sa “It’s Showtime,” diin pirmi kining gipasundayag uban sa mga host ug guest celebrities. Ang dance challenge sa Oohh Lala Baby mikaylap sa TikTok, Facebook ug Instagram, samtang daghang artista ug content creators ang mihimo sa ilang kaugalingong bersyon sa sayaw.
Sumala sa StarPop, ang mga kanta sa “ZoomBaby Dolls” gihimo aron makahatag og positibong enerhiya ug makadasig sa mga tawo sa paglihok, pag-ehersisyo ug paglingaw. Ang novelty-pop ug dance music maoy nahimong identidad sa grupo, nga nakahatag kanila og lahi nga puwesto sa nagkadako nga industriya sa P-pop.
Karon, ang Baby Dolls padayon nga nagpalapad sa ilang impluwensya pinaagi sa live performances, dance tours ug bag-ong musika. Uban sa sunod-sunod nilang viral hits, klaro nga dili na lamang sila usa ka noontime dance group, kondili usa na ka bag-ong pwersa sa lokal nga P-pop nga nakapalingaw ug nakapapakilig sa milyon-milyong Pilipino.
Photo Courtesy: FB / SHOWTIME BABY DOLLS
