Giluwas sa South African nga mag-uuma ug kanhi sundalo nga si Marius Els ang usa ka lima ka bulan nga hippopotamus nga ginganlag Humphrey human sa grabeng pagbaha. Gipadako niya kini sa iyang umahan, kauban niya sa paglangoy ug gitawag niya kini nga “murag akong anak.”
Bisan pa sa balik-balik nga mga pasidaan sa mga eksperto sa ihalas nga mga mananap ug sa mga insidente diin gigukod ni Humphrey ang mga tawo ug giatake ang mga kahayopan, nagtuo si Els nga lahi ang ilang panag-uban.
Apan ang maong pagtuo natapos sa trahedya. Human sa unom ka tuig nila nga panag-uban, giatake sa hippopotamus si Els, gipaak ug giguyod siya ngadto sa suba hangtod namatay.
Nakit-an ang iyang lawas sa maong suba diin unang naluwas si Humphrey, usa ka makapasubo nga pahinumdom nga bisan unsa pa kalig-on ang relasyon sa tawo ug sa ihalas nga mananap, dili gihapon mapapas ang natural nilang kinaiya.
Photo Courtesy: Ignite Your Mind
