Mas gipalig-on ang kahibalo ug praktikal nga kahanas sa mga lider sa nagkalainlaing barangay sa lungsod sa Laak human sa pagbansay sa Cardiopulmonary Resuscitation (CPR) ug Basic First Aid. Gipasiugdahan kini sa Philippine Red Cross – Davao de Oro Chapter isip kabahin sa pagsaulog sa World Restart a Heart Day 2026.
Gipahigayon ang kalihokan ubos sa Community-Based Resiliency Management Training Program sa Pangagamhanan sa Probinsya sa Davao de Oro, sa pagpangulo ni Gobernador Raul Mabanglo, pinaagi sa Provincial Disaster Risk Reduction and Management Office (PDRRMO).
Tumong niini nga pagbansay ang masiguro nga andam na ang mga lider sa barangay — makahimo sa dihadiha ug sakto nga pagtabang sa mga tawo nga makasinati og emerhensiya, ilabi na sa mga sitwasyon nga nagkinahanglan og dinaliang first aid ug CPR aron maluwas ang kinabuhi.
Gipasalamatan usab sa Philippine Red Cross – Davao de Oro Chapter ang probinsyal nga pangagamhanan, ang PDRRMO, ug ang tanang partisipante sa ilang dakong kooperasyon. Ang maong kalihokan nagtumong sa pagpalig-on sa kahandam sa tibuok komunidad ug pagpakaylap sa kahibalo nga makaluwas sa kinabuhi.
