Tingkagol sa bilanggoan ang tulo ka lalaki nga giila sa mga alyas nga “Amak,” 27 anyos; “Kimmy,” 25 anyos; ug “Meloy,” 18 anyos, puros mga construction worker ug parehong residente sa dakbayan sa Tacloban human sila madakpan sa buy-bust operation nga gipahigayon sa City Police Drug Enforcement Unit sa Tacloban City Police Office (TCPO) didto sa Tigawon 1, Barangay 96 Calanipawan, Tacloban City niadtong Oktubre 17, 2026.
Usa sa mga nadakpan giila sa kapulisan nga High Value Individual (HVI), samtang ang duha giila nga Street Level Individuals (SLIs).
Atol sa operasyon, usa ka operatiba ang nagsilbing poseur-buyer ug nakapalit og gidudahang shabu nga nagkantidad og ₱2,500 gikan kang alyas “Amak.” Sa sunod nga paginspeksiyon nga gihimo subay sa balaod, narekober ang lima ka heat-sealed transparent plastic sachet, usa ka kalibre 9mm nga Rock Island Armory pistol, usa ka magasin sa pistola nga adunay tulo ka buhing bala, usa ka coin purse, usa ka belt bag, ug ang gigamit nga buy-bust money.
Gidala sa Regional Forensic Unit 8 ang mga nakumpiskang gidudahang ilegal nga droga alang sa laboratory examination. Samtang ang tulo ka dinakpan anaa na sa kustodiya sa TCPO alang sa dokumentasyon ug tukmang legal nga proseso.
Photo courtesy: PNP Tacloban City Police Office
