Gisubay sa Department of Trade and Industry-Davao de Oro Provincial Office (DTI-DDO) ang presyo sa nagkalainlaing batakang panginahanglanon sa mga konsumante sa tibuok probinsya, isip kabahin sa regular nga pagmonitor gikan Oktubre 12 hangtod 16, 2026.
Lakip sa mga produkto nga gibantayan sa ahensya ang de-latang sardinas ug karne, processed milk, instant coffee, asin, sabon panlaba, kandila, suka, toyo, patis, sabon panglawas ug baterya.
Gibuhat kini subay sa Price Act o Republic Act No. 7581, nga giusab pinaagi sa Republic Act No. 10623, alang sa pagmonitor sa presyo ug suplay sa mga batakang palaliton.
Gipatin-aw usab sa DTI-DDO nga ang presyo sa mga produktong pang-agrikultura sama sa preskong karne, manok ug mga utanon sakop sa pagmonitor sa Department of Agriculture (DA).
Giawhag ang publiko nga magmatngon sa presyo sa mga palaliton ug magpabiling nahibalo sa ilang katungod isip konsumante, samtang nagpadayon ang ahensya sa pagpanalipod sa kaayohan sa mga pumapalit ug pagpasiugda sa responsable nga pagnegosyo.
Photo courtesy: DTI-DAVAO DE ORO
