Nakatapos na sa Pantawid Pamilyang Pilipino Program (4Ps) ang 494 ka pamilyang benepisyaryo sa Maco, Davao de Oro atol sa Graduation and Exit Ceremony nga gipahigayon niadtong Oktubre 15, 2026.
Gipangunahan sa Department of Social Welfare and Development (DSWD) Field Office XI, pinaagi sa 4Ps Municipal Operations Office sa Maco, uban sa Lokal nga Panggamhanan sa Maco, ang kalihokan aron ilhon ang kalamboan sa mga pamilyang nakakompleto na sa programa.
Isip dugang nga suporta, giapod-apod sa lokal nga panggamhanan ang Exit Package Vouchers (EPV), samtang gi-endorso usab ang mga case folder ug interbensiyon aron masiguro ang padayon nga paggiya ug paghatag og serbisyo sa mga pamilya.
Giawhag ni Maco Mayor Arthur Carlos Voltaire R. Rimando ang mga benepisyaryo nga ipadayon ang disiplina, pagkamalahutayon ug paningkamot aron mapalig-on ang ilang panginabuhi ug makabarog sa kaugalingong tiil.
Gipunting nga dili kataposan sa ilang paningkamot ang paggawas sa programa, kondili sinugdanan kini sa bag-ong yugto aron mapadayon ang kalamboan ug matukod ang mas lig-on nga kaugmaon sa ilang mga pamilya.
