Gihatagan sa kapitolyo og ₱3,000 nga fuel subsidy ang kapin 2,000 ka habal-habal drivers sa Pinamungajan ug Asturias aron matabangan sila sa pagsaka sa presyo sa petrolyo, diin ang matag benepisyaryo nakadawat usab og 10 ka kilo nga bugas.
Gipangulohan ni cebu Governor Pamela Baricuatro ang pag-apod-apod sa kinatibuk-ang ₱6.4 milyong ayuda ug giingon nga ang iyang prayoridad mao ang pagserbisyo sa katawhan labaw sa politika.
Gitunol usab sa Kapitolyo ngadto sa Asturias ang mga kabaw, kanding, veterinary supplies, ug anti-rabies vaccines, samtang nakadawat ang Pinamungajan og HDPE hose aron mapalambo ang ilang mga water line.
Gihatagan usab ang duha ka lungsod og agricultural assistance ubos sa FAITH Program, lakip ang walking tractor, mga punuan, ug abono aron masuportahan ang lokal nga produksyon sa pagkaon.
Gipasalamatan sa mga opisyal sa Pinamungajan ug Asturias ang padayon nga suporta sa Kapitolyo, uban sa pag-anunsyo sa dugang nga mga proyekto sa imprastraktura ug edukasyon alang sa ilang mga komunidad.
Photo courtesy: Cebu Province
