Posibleng moubos ang mga tax perks nga gihatag ngadto sa mga dagkong multinasyonal nga kompanya kon ipatuman sa Pilipinas ang gisugyot nga Qualified Domestic Minimum Top-up Tax (QDMTT), sumala sa pasidaan sa usa ka eksperto.
Matod ni Carlo Navarro, ang Tax & Legal Leader sa Deloitte Philippines, daghan sa mga langyaw nga mamumuhunan karon ang wala nagbayad og buhis sa nasod tungod sa mga insentibo nga ilang gipahimuslan. Apan ubos sa bag-ong lagda sa QDMTT, mapugos na ang Pilipinas sa pagpahamtang og labing minos 15% nga buhis sa mga kita nga kaniadto gawasnon sa buhis, butang nga makapamenos sa benepisyo sa mga insentibo ug mamahimong motukmod sa mga investors nga mobalhin sa ubang mga nasod nga nagtanyag og mas maayong dagan sa buhis.
Kini nga QDMTT kabahin sa Pillar Two framework sa Organisation for Economic Co-operation and Development (OECD), nga nagtakda og tibuok kalibutan nga minimum effective tax rate nga 15% para sa mga dagkong multinasyonal nga kompanya.
Bisan pa man nga wala pa mapasa ang balaod sa Pilipinas, gitinguha sa kagamhanan nga mapatuman kini sa tuig 2027 ug masugdan ang pagpangolekta sa 2028. Matod ni Navarro, kinahanglan nga ipatuman kini sa nasod aron dili mapadulong sa ubang hurisdiksyon ang buhis nga alang unta sa Pilipinas, sanglit gibana-bana nga moabot sa P20 bilyon ang mamahimong makolekta gikan pa lang sa pito ka dagkong konglomerat base sa banabana niadtong 2023, ug posible pa kining modagan ngadto sa trilyones kon iapil ang uban.
Aron magpabilin nga kompetitibo ang Pilipinas taliwala sa pagpatuman sa Pillar Two, gisugyot ni Navarro nga repasohon sa kagamhanan ang kasamtangang sistema sa insentibo, sama sa pagpalambo sa “enhanced deduction regime.” Gidugang usab niya nga mamahimong tun-an sa nasod ang mga pamaagi sa mga silingang nasod sama sa “qualified refundable tax credit” sa Singapore aron makakuha og ideya sa pagpalambo sa sistema. Hinuon, iyang gipahinumdoman ang gobyerno nga dili lang basta-basta kopyahon ang mga pamaagi sa silingang mga dapit aron masiguro nga aduna gihapoy talagsaon nga bentaha ang Pilipinas sa pagdani sa mga langyaw nga magpapatakod.
Photo courtesy: CEPR
