Gikabalak-ang nakalas ang kapin 500 ka tawo human malunod ang duha ka bangka sa baybayon sa Myanmar sa milabayng mga adlaw, sumala sa taho gikan sa mga ahensya sa United Nations (UN). Nawad-an og kontak ang unang bangka human kini mibiya nga adunay sakay nga gibana-banang 250 ka tawo. Gituohan usab nga naunlod ang ikaduhang bangka sa dapit sa Ayeyarwady coast sa Myanmar nga nagdala og laing 280 ka pasahero.
Kadaghanan sa mga pasahero mga refugee gikan sa minoryang Rohingya Muslim. Matod sa UN High Commissioner for Refugees (UNHCR) ug International Organization for Migration (IOM), mibiyahe ang mga bangka gawas sa regular nga “sailing season” diin daut, baluron, ug delikado kaayo ang dagan sa kadagatan.
Ang mga Rohingya kanunay nga mosakay sa mga gagmayng bangka nga gama sa kahoy aron lang makaikyas sa nagpadayong kagubot sa Myanmar ug sa naghuot nga mga refugee camp sa Bangladesh. Tinguha nila nga makaabot sa mga silingang nasod sama sa Malaysia, Indonesia, o Thailand sa paglaom nga makakaplag og kaluwasan ug mas maayong oportunidad sa kinabuhi.
Photo courtesy: UNHCR/Kenzie Eagan
