Gipahibalo ni Agriculture Secretary Francisco Tiu Laurel Jr. ang duha ka pamaagi sa kagamhanan aron matabangan nga mosaka ang kita sa mga mag-uuma sa nasod. Una niini ang pagmando sa National Food Authority (NFA) nga patas-an ang pinakagamay nga presyo sa pinalitay sa basang humay (palay) gikan sa P17 ngadto na sa P21 kada kilo sugod karong umaabot nga ting-ani sa Septyembre.
Katuyoan niini nga maalalayan ang mga mag-uuma taliwala sa sige nga pagsaka sa presyo sa abono ug uban pang galastuhan sa pagpanguma. Ikaduha, gipahunong una sa kalihim ang pagsulod sa imported nga bugas sa Iloilo sugod sa tunga-tunga sa Septyembre hangtod sa katapusan sa Nobyembre aron dili maapektohan ug dili mousos ang presyo sa lokal nga abot panahon sa kinapungkayan sa ting-ani.
Dungan niini, giablihan usab ni Tiu Laurel ang P355-milyon nga rice processing facility didto sa Dumangas, Iloilo. Kini nga pasilidad adunay kapasidad nga moproproseso og hangtod sa 4,800 ka sako sa 50-kilos nga humay matag adlaw, ug nasangkapan kini og mga mechanical dryer aron makapalit ang NFA og bag-ong palay sa mas taas nga presyo. Aduna usab kini dako nga bodega nga makakupot og hangtod sa 12 porsyento sa gilaumang abot sa Iloilo, butang nga makatabang pag-ayo sa pagpabilin nga lig-on ug patas sa presyo sa humay diha sa merkado.
Dugang pa sa kalihim, aduna pay duha ka dagkong pasilidad sa Iloilo ang gikatakdang ablihan sa dili pa ang ting-ani sa Oktubre.
Sa tibuok nasod, kasamtangang nagpatukod ang NFA og 36 ka moderno nga post-harvest facilities, diin ang katunga niini gilaumang magamit na karong wet season (ting-ulan) ug ang nahabilin ablihan sa dili pa ang ting-ani sa dry season (ting-init) sa sunod tuig.
Matod pa ni Tiu Laurel, kining tanan kabahin sa tinguha sa administrasyon nga mapatuman ang modernisasyon sa sektor sa agrikultura, mapataas ang kita sa mga mag-uuma, mapabilin nga barato ang pagkaon, ug mapalig-on ang seguridad sa pagkaon sa tibuok Pilipinas.
Photo courtesy: PNA/ Ben Briones
