Patay ang usa ka 43-anyos nga subject sa search warrant human kini giingong misukol ug mipusil sa mga kapulisan, nga misangpot sa pagbinaylohay og mga bala, samtang giserbisyuhan unta sa mga otoridad ang search warrant sa Sitio Tuko, Barangay Inolingan, Moises Padilla, Negros Occidental, niadtong Agosto 30,2026.
Giila ang namatay sa alyas “Reynan,” 43-anyos ug residente sa maong lugar, nga subject sa search warrant may kalabotan sa paglapas sa Republic Act 10591 o Comprehensive Law on Firearms and Ammunition.
Sumala kang Police Major Ryan Villasario, hepe sa Moises Padilla Municipal Police Station, kalit nga namusil ang suspek ngadto sa mga pulis samtang padulong sila sa maong lugar aron ipatuman ang search warrant, hinungdan nga misukol ang kapulisan ug nahitabo ang engkwentro.
Naigo si Reynan atol sa pagbinaylohay og mga bala ug namatay tungod sa iyang mga samad. Narekober sa lugar ang usa ka empty shell sa 12-gauge shotgun, usa ka shotgun ug usa ka caliber .45 nga pistola.
Gipadayag usab ni Villasario nga kaniadto nang nadakpan ang suspek may kalabotan sa paglapas sa RA 9165 o Comprehensive Dangerous Drugs Act of 2002.
Photo Courtesy: HINIGARAN PNP
