Nagduso ang pipila ka mga senador sa pagpahigayon og imbestigasyon sa Senado kabahin sa padayon nga pagsaka sa bayranan sa kuryente ug sa mga polisiya nga nagdumala sa sektor sa enerhiya.
Pinaagi sa nagkalain-laing resolusyon nga gisang-at nila Senador Bam Aquino, Risa Hontiveros ug Ping Lacson, ilang gipangayo nga susihon ang nagkadaghang reklamo sa mga konsumidor bahin sa kalit nga pagsaka sa electric bill, mga iregularidad sa metro sa kuryente, ug sa pagdumala sa mga reklamo sa mga kostumer.
Matod ni Aquino, ang Pilipinas usa sa mga nasud sa Southeast Asia nga adunay pinakataas nga kantidad sa kuryente, busa kinahanglan nang repasohon ug usbon ang mga balaod aron moubos ang gasto sa kuryente sa mga konsumidor.
Samtang si Hontiveros nagtinguha nga amendahan ang Magna Carta for Residential Electricity Consumers, ilabina ang polisiya nga nagmando nga kinahanglan una mobayad ang konsumidor sa giapelang bayranan aron dili maputlan og suplay sa kuryente.
Sa laing bahin, nanawagan usab si Lacson nga palig-onon ang transparency ug accountability sa mga power service provider aron mapanalipdan ang mga konsumidor batok sa gitawag nga “bill shock” ug mga alegasyon sa sayop nga meter reading.
Sa iyang resolusyon, gihisgutan ni Lacson ang mga reklamo batok sa Meralco human misaka ang residential electricity rate gikan sa ₱13.2730 kada kilowatt-hour niadtong Enero ngadto sa ₱14.8261 kada kilowatt-hour karong Hulyo.
Samtang, nanawagan usab ang Power for People Coalition sa Energy Regulatory Commission o ERC nga ipa-audit ang billing system sa Meralco ug ipadapat ang angay nga silot kon mapamatud-ang adunay mga iregularidad.
Sa bahin sa ERC, giingon ni Chairperson Francis Saturnino Juan nga ilang gipaandam na daan ang publiko sa posibleng pagsaka sa presyo sa kuryente tungod sa misaka nga demand, nipis nga suplay, ug uban pang hinungdan. Dugang pa, gikatakdang mosaka pag-usab ang singil sa Meralco karong Hulyo og ₱0.3428 kada kilowatt-hour, nga katumbas sa dugang nga ₱69 sa binuwan nga bayranan sa panimalay nga mogamit og 200 kilowatt-hour.
