Gipangandaman karon sa Social Security System (SSS) ang bag-ong loan program nga alang sa pagpa-install og residential solar panels sa mga panimalay sa ilang mga miyembro.
Sumala kang SSS President ug Chief Executive Officer Robert Joseph de Claro, gilantaw sa ahensya ang pagahin og mokabat sa ₱40 bilyon alang sa maong programa, nga gilaumang ianunsyo sa bulan sa Setyembre human paghimo sa mga lagda ug giya sa implementasyon.
Ubos sa programa, ang usa ka miyembro mahimong makahulam og hangtod ₱300,000 ngadto sa ₱400,000 alang sa pagpa-install sa solar panel sa ilang balay, nga mabayran sulod sa upat hangtod pito ka tuig.
Gilauman nga mokabenepisyo ang mokabat sa 100,000 ka panimalay sa tibuok nasud. Samtang ang interest rate sa loan wala pa matino, apan posible kining ibase sa kasamtangang Treasury bill rate sa panahon sa pagpatuman sa programa.
Matud pa sa SSS, gitumong ang maong programa aron matabangan ang mga miyembro nga makapamenos sa ilang gasto sa kuryente pinaagi sa paggamit og solar energy, ilabina sa padayon nga pagsaka sa presyo sa elektrisidad sa nasud.
