Patay ang usa ka 14-anyos nga babayeng lumad human gipaak sa usa ka bitin nga gitawag og swaga o banakon sa Crossing Kuda, Barangay Batian, Maitum, Sarangani Province Hulyo 13,2026.
Sumala sa gisaysay sa iyang lolo, naligo ang biktima uban sa iyang tulo ka mga ig-agaw sa usa ka sapa sa dihang kalit silang giatake sa maong bitin.
Tungod kay siya ang labing magulang sa mga bata, wala siya magduha-duha sa pagpanalipod sa iyang mga ig-agaw. Gidupahan niya ang tulo ka bata aron dili sila mapaakan, apan tungod niini, siya mismo ang napaakan sa likod sa maong bitin.
Dugang pa sa iyang lolo, kung wala pa gidepensahan sa batan-ong babaye ang iyang mga ig-agaw, posible nga naapil usab kini sa mga napaakan.
Gidali pa unta ang biktima sa pagdala ngadto sa ospital, apan wala na kini makaabot nga buhi tungod sa kalala sa maong bitin.
Samtang, adunay mga maayong kasingkasing nga mitabang sa pamilya sa biktima aron dili na sila mogasto sa serbisyo sa punerarya.
Ang nahitabong insidente nagbilin og dakong kasubo sa pamilya ug komunidad, samtang daghan ang mitawag sa batan-ong babaye nga usa ka bayani tungod sa iyang kaisog ug paghalad sa kaugalingong kaluwasan aron mapanalipdan ang iyang mga ig-agaw.
Photo Courtesy: James Reganit
