Naka alerto karon ang mga personahe sa Provincial Disaster Risk Reduction and Management Office kun (PDRRMO) sa pagmonitor sa matag lungsod sa Misamis Oriental tungod sa mga pag-ulan nga nasinatian sa lalawigan.
Sa one-on-one interview ning sibyahan ngadto kang PDRRMO Department Head, Fernando Sotsot Dy, iyang gibutyag nga nagpabiling kalmado ang mga kasubaan sa matag lungsod o syudad taliwala sa mga pag-ulan karong semanaha. Apan hugot gihapon ang ilang pagmonitor sa palibot aron masiguro ang seguridad og kaluwasan sa mga Misamisnon sa matag karon ug unya.
Giklaro usab niini nga dili lang sa MisOr ang ilang ginamonitor kada adlaw gumikan kay lakip sa ilang ginamonitor ang kasikbit nga lalawigan hilabi na sa Bukidnon area nga sagad ginaulan. Matud pa, ang ubang kasubaan sa lawigan sa MisOr ang usa sa mga exit point sa mga tubig baha hilabi na kung mobundak ang ulan didtong dapita.
Gawas sa gipahugtan ang pagmonitor sa mga lugar, ila usab gipalig-on ug gipahugtan ang pag-communicate sa matag MDRRMO, CDRRMO og PDRRMO aron kung sa higayon adunay mga trahediya, mas mapadali matud pa ang operasyon.
Photo courtesy: Misamis Oriental-PROVINCIAL Disaster RISK Reduction & Management Office
