Gilunsad ang Northern Mindanao Road Safety Action Plan 2026-2030 sa dakbayan sa Cagayan de Oro niadtong nakalabay nga adlaw.
Gipangunahan kini sa Department of Health Northern Mindanao uban sa World Health Organization ug ubang ahensya sa gobyerno nga may dakong kalambigitan sa pagpatuman sa kaluwasan sa kadalanan.
Nag-unang tumong niini nga action plan nga makunhuran sa singkwenta porsyento ang ihap sa mga nangamatay tungod sa disgrasya sa kadalanan pag-abot sa tuig 2030.
Sa nahipos nga datus sa Philippine Statistics Authority, sa tuig 2023 palang, nikababat na sa 926 ang namatay tungod sa aksidente sa kadalanan.
Gikan tuig 2019-2023, pinakadaghang natalang namatay sa probinsyan sa Bukidnon nga adunay 1, 530; gisundan sa Cagayan de Oro City sa ihap nga 848. Labing apektado sab niini ang mga nag-edad sa 20 anyos hangtud sa 29 anyos.
Sumala pa ni DOH X Regional Director, Dr. Sulpicio Henry Legaspi Jr., tungod niini nga mga datus, labing mahinungdanon nga mapatuman ang lig-on nga Road Safety Action Plan sa tibuok rehiyon.
Pagatutukan sa action plan ang pagpalig-on sa road safety management, pagsiguro sa mas luwas nga kadalanan, luwas ug compliant nga salakyan, dugang proteksyon sa mga bulnerableng road users ug pagpalambo sa post-crash care o pag-atiman sa mga biktima human sa aksidente.
