Usa ka higanteng bato nga gibanabanang kapin sa 10,000 ka tuig ang kagulangon ang nahimong talagsaong atraksyon sulod sa Viimsi Shopping Center sa nasod nga Estonia.
Nadiskubrehan ang maong bato sa dihang nagkalot ang construction company alang sa pundasyon sa shopping center niadtong 2014. Sa sinugdan, plano unta nila kining pabuthon aron matangtang, apan misupak ang mga residente tungod sa kahadlok nga madaot ang ilang mga balay.
Sa pagsusi sa mga geologist, nasayran nga ang bato usa ka erratic boulder nga nabilin gikan pa sa panahon sa Ice Age ug kwalipikado nga mapanalipdan ubos sa conservation laws sa Estonia.
Tungod niini, wala na lang kini hilabti sa construction company. Hinuon, giusab ang disenyo sa shopping center aron mapreserbar ang maong bato ug mahimong kabahin sa estruktura sa establisyemento.
Sa pagkakaron, ang higanteng bato dili na lamang usa ka talagsaong bahin sa mall kondili gigamit usab isip display area sa mga artwork ug nahimo nang usa sa mga paboritong tourist attraction sa maong lugar.
Photo Courtesy: Reddit
