Opisyal nang gikasal ang aktres nga si Bea Alonzo ug negosyanteng si Vincent Co, sumala sa pamahayag sa legal counsel ni Bea nga si Atty. Joey V. Garcia.
Matud ni Garcia, nahitabo ang kasal alas-7 sa gabii niadtong Hulyo 13, 2026 sa Makati City Hall, diin si Makati Mayor Nancy Binay maoy nangulo sa seremonya.
Gipasabot usab sa abogado nga walay kamatuoran ang mga migawas nga espekulasyon nga adunay panaglalis o wala magkasinabot ang duha ka kampo bahin sa ilang prenuptial agreement.
Matud pa niya, boluntaryo ug hingpit nga nasabtan sa magtiayon ang pagpirma sa prenuptial agreement sa wala pa ang ilang kasal. Giklaro usab niya nga walay legal nga babag nga may kalabotan sa maong kasabutan.
Kini supak sa nanggawas nga mga report nga adunay pipila ka probisyon sa prenup nga wala kuno gikasabotan sa duha ka panig.
Midumili na si Garcia sa paghatag og dugang detalye isip pagtahod sa pribadong kinabuhi ug kompidensyalidad sa bag-ong magtiayon.
Samtang, gikumpirma usab ni Mayor Nancy Binay pinaagi sa iyang Facebook post niadtong Martes sa gabii nga siya ang nagkasal kang Bea ug Vincent. Gipaambit niya ang litrato sa magtiayon human sa seremonya uban sa mensahe nga nagpasalamat ug nanghinaut og malipayong kaminyoon alang kanilang duha.
Photo courtesy: Showbiz Broadcast
