Arestado ang usa ka Police Corporal human giakusahan sa pagpanumbag sa usa ka kanhi kagawad ug pagtion og armas atol sa kagubot nga nahitabo alas 1:45 sa kadlawon sa Purok 2, Barangay Matabao, Buenavista, Agusan del Norte.
Ang biktima giila nga si Ronald Tabañag Gonzaga, 54 anyos, negosyante ug kanhi kagawad sa Buenavista. Samtang ang suspek mao si PCpl Gwendolene Sagario Gabas, 39 anyos, nga na-assign sa Nasipit Municipal Police Station.
Sumala sa Buenavista Municipal Police Station, nakadawat sila og report bahin sa kagubot ug dihang miresponde ang mga pulis, ilang naabtan ang biktima nga adunay mga bun-og sa lawas.
Sa inisyal nga imbestigasyon, nasayran nga gikan sa pag-inom ang biktima ug ang iyang mga kauban sa wala pa sila mobalhin sa Barangay Matabao. Didto, nagkita ang biktima ug ang iyang kanhing uyab nga karon giingong adunay relasyon sa suspek nga pulis. Tungod niini, nagka-init ang ilang panaglalis hangtod misangpot sa komosyon.
Gidugang pa sa kapulisan nga gibunot sa suspek ang iyang service firearm nga Glock 17 Gen 4, 9mm pistol ug gition kini ngadto sa biktima nga kagawad, unabanan sa mga nag pungas inga kinumo.
Dihang miabot ang responding police officers, ilang gidakop ug gi-disarmahan ang suspek. Sa karon ana-a na kini sa Buenavista Municipal Police Station samtang gipadayon ang legal nga proseso ug pag-andam sa angay nga mga kaso batok kaniya.
