Patay ang usa ka babaye nga naka-angkas sa single motor, samtang naangol ang usa ka lalaki nga driver human mabagnus ug mabunal ang ilang gisakyang motorsiklo alas 4:00 sa hapon sa Purok 2, Barangay San Francisco (Hacienda), Mainit, Surigao del Norte.
Giila ang namatay nga si Ashley L. Lucenio, residente sa Barangay San Juan, Alegria, Surigao del Norte. Samtang ang driver mao si Jose L. Cortes Jr., taga Barangay San Pedro, Alegria, ang nakaangkon og mga samad ug bung-og sa kalawasan.
Base sa inisyal nga impormasyon, gikan nanga ligo sa Cantapoy ang duha ug pauli na unta sa dihang kalit nga nabaliskad ang ilang motorsiklo. Tungod sa kusog nga impact, nabunal ang ulo sa biktima sa sementadong dalan nga maoy hinungdan sa iyang kamatayon.
Gidala pa ang duha sa balay tambalanan, apan gideklarang dead on arrival ang biktimang babae. Matud pa sa mga residente sa maong lugar, ang nadaot o putol nga bahin sa aspalto sa maong dalan, ang Nakita nilang hinungdan kay daghan nang nangalukot nga mga motorista.
Tungod niini, nanawagan sila sa mga hingtungdan nga mahatagan kini og dayong pag-ayo aron malikayan ang susamang mga insidente.
Samtang padayon pa ang imbestigasyon sa Mainit Municipal Police Station aron matino ang tukmang hinungdan sa aksidente.
