Daling girespondehan ang kapulisan sa Tagum City ug nadakpan ang giingong suspek sa pagpusil-patay sa usa ka giilang welder sa Pioneer Avenue, Barangay Magugpo West, Tagum City pinaagi sa hot pursuit operation, buntag sa Hulyo 12, 2026.
Giila ang biktima sa alyas nga “Nardo,” ulitawo ug lumad sa Marilog District, Davao City. Sumala sa inisyal nga imbestigasyon, nahitabo ang insidente human siya makasinati og komprontasyon sa laing indibidwal duol nga tindahan diin sila mipalit og ilimnon.
Samtang nagpadayon ang mga imbestigador sa pagpangita og ebidensya ug pagpangayo og pahayag sa mga saksi, usa sa mga testigo mitug-an nga samtang naglakaw sila sa Pioneer Avenue, kalit silang giduolan sa giingong suspek nga giila sa alyas nga “Randy,” 35 anyos, usa ka pintor. Didto kalit nga mipabuto ang suspek ug naigo ang biktima sa tiyan nga bahin, nga maoy hinungdan sa iyang hinanaling kamatayon.
Gilunsad gilayon ang koordinadong operasyon sa Davao del Norte Police Provincial Office, Tagum City Police Station, Provincial Intelligence Unit, Provincial Mobile Force Company ug SWAT Team.
Bandang alas 9:32 sa buntag, sa susamang petsa, nasikop ang suspek sa iyang pinuy-anan sa Villa Magsanoc, Barangay Mankilam, Tagum City.
Nakuha usab sa iyang posesyon ang usa ka caliber.45 nga pistola nga adunay magazine ug lima ka buhing bala, nga gituohang may kalabotan sa nahitabong krimen.
Gipangandaman na karon sa Tagum City Police Station ang pagpasaka sa kasong kriminal batok sa nadakpang suspetsado.
Gipasabot usab sa kapulisan nga magpadayon sila sa paspas nga pagresponde ug lig-on nga kampanya batok sa kriminalidad aron masiguro nga adunay hustisya alang sa biktima ug mapabiling malinawon ang komunidad.
Photo Courtesy: PNP Tagum City Police Station
