Nasikop ang usa ka 49 anyos nga lalaki atol sa usa ka malampusong buy-bust operation nga gipahigayon sa Hinatuan Municipal Police Station sa pakigtambayayong sa Philippine Drug Enforcement Agency (PDEA) Surigao del Sur Provincial Office pasado alas-12:27 sa kadlawon niadtong nakalabay nga adlaw, sa Barangay Tiwi, Hinatuan.
Ang suspek usa ka residente sa Purok 1, Barangay San Juan, Hinatuan, Surigao del Sur.
Narekober gikan sa suspek ang duha ka heat-sealed transparent plastic sachet nga adunay puti nga gituohang shabu. Ang mga nakuha nga ilegal nga droga adunay gibana-banang gibug-aton nga duha ka gramo ug balor nga ₱13,600, base sa Dangerous Drugs Board (DDB) standard value.
Nasakmit usab sa kapulisan ang buy-bust money ug ubang drug paraphernalia nga may kalabutan sa ilegal nga kalihokan.
Ang tanang ebidensiya husto nga gimarkahan ug giimbentaryo atubangan sa mga opisyal sa Barangay Tiwi ug usa ka representante sa media, subay sa mga probisyon sa Republic Act No. 9165 o ang Comprehensive Dangerous Drugs Act of 2002.
Gipahibalo usab sa kapulisan ang suspek sa iyang mga katungod ubos sa Miranda Doctrine ug Anti-Torture Act sa wala pa kini gidala sa kustodiya sa kapulisan alang sa hustong disposisyon ug pagsang-at sa angay nga mga kaso.
