Nipahayag og kabalaka si Cebu City Mayor Nestor Archival nga posibleng malangan o dili na mapadayon ang Bus Rapid Transit (BRT) project sa siyudad sa Sugbo tungod sa mga isyu nga mitumaw bahin sa gihisgutang realignment sa proyekto.
Sumala sa mayor, wala tangtanga ang orihinal nga ruta sa BRT nga gikan sa Bulacao paingon sa Talamban. Iyang gipasabot nga nagpabilin kini nga kabahin sa proyekto, apan giuna lang ang mga bahin nga mas sayon ug dali ipatuman.
Matud ni Archival, sa panahon ni kanhi Mayor Edgardo Labella, gihatagan og prayoridad ang corridor gikan sa Ayala paingon sa SM City Cebu. Bisan wala siya mouyon sa maong lakang kaniadto, iyang giingon nga dili na angay usbon kini karon tungod kay mahimo kining hinungdan nga mawagtang ang tibuok proyekto.
Ang kabalaka sa mayor mitumaw human gisupak sa Cebu City Council ang gihisgutang realignment sa proyekto nga naglangkob sa rutang gikan sa South Road Properties (SRP) paingon sa Ayala Center Cebu.
Gihingusgan sa konseho, pinaagi sa pag-insister ni Vice Mayor Tomas Osmeña, nga angay ibalik ang orihinal nga plano sa BRT nga nagkonektar sa Bulacao ug Talamban.
Sa kasamtangan, ang Phase 2 sa BRT project giplanong gikan sa South Road Properties pinaagi sa F. Vestil Street paingon sa BRT station sa Natalio Bacalso Avenue. Lakip usab sa plano ang rutang magsugod sa Cebu Provincial Capitol, moagi sa Ayala Center Cebu, ug matapos sa IT Park.
Photo Courtesy:Wikipedia
