Gihatagan og gibug-aton karon sa Department of Health (DOH) Region 10 ang kamahinungdanon sa kahibalo sa pagluwas sa kinabuhi pinaagi sa pag-awhag sa publiko nga magbaton og labing minus usa ka miyembro sa matag pamilya nga makamao sa Cardiopulmonary Resuscitation (CPR).
Ang panawagan gihimo dungan sa pagsaulog sa National CPR Month, nga nagdala sa mensahe nga: “Bawat Segundo Mahalaga: CPR Saves Lives.”
Sumala ni Dr. John Raymond Suazo, ang Development Management Officer sa Disaster Response Unit sa DOH-X, usa kini ka mahinungdanong lakang alang sa disaster preparedness o pagpangandam sa panahon sa kalamidad ug emerhensya. Gipasabot ni Dr. Suazo nga bisan kinsa pwedeng makahimo ug pwedeng ma-train sa basic life support.
Alang sa mga interesado, iyang gitambag nga kinahanglan magpaubos sa retraining matag duha ka tuig aron maupdate sa mga bag-ong pamaagi sa pagsalba og kinabuhi.
Gipalig-on sab sa DOH-X ang kampanya alang sa “hands-only CPR” nga dako og tabang sa mga medical emergency sama sa pagkalumos o cardiac arrest, ilabi na kung ang biktima nawad-an na sa panimuot ug wala nay pulso.
Pahinumdom sab ni Dr Suazo nga importante kaayo nga dili undangon ang pagcompress o pag-CPR sa pasyente hangtod nga walay moabot nga propesyonal nga rescue team, tungod kay sa matag segundo nga malangan, kinabuhi sa tawo ang nakataya.
