Nagkadaghan karon ang mga tawo sa Pilipinas sa pagpataud og solar power sa ilang atop aron makalikay sa nagkamahal nga bayrunon sa kuryente, butang nga naghimo sa nasod nga pinakadakong naggasto sa solar panel sa tibuok kalibotan sukad nagsugod ang gubat sa Iran.
Ang Meralco nipasaka og 10% sa singil sukad niadtong ulahing bahin sa Pebrero, hinungdan nga ang usa ka kasarangang pamilya naggasto na karon og 12% sa ilang binuwan nga kita alang lang sa kuryente. Tungod kay walay subsidy sa kuryente ang gobyerno, ang Pilipinas ang adunay pinakataas nga presyo sa kuryente alang sa mga panimalay sa tibuok Southeast Asia.
Tungod niini, misaka og 145% ang importasyon sa mga solar panel gikan sa China nga mitala og $407 million sulod lang sa tulo ka bulan hangtod Mayo. Ang mga kompanya sa solar, sama sa Philergy German Solar, nakasinati og sobra sa duha ka pilo nga pagsaka sa mga inquiries o pangutana gikan sa mga kustomer nga mas paspas na usab modesisyon sa pagpalit karon. Gilauman sa mga eksperto nga sulod sa duha ka tuig, motaas og katulo ka pilo ang kapasidad sa distributed solar sa nasod tungod kay mas paspas na nga mabawi ang nagasto sa pagpataod niini.
Bisan pa man niining dako nga demand, aduna gihapon mga hagit sama sa kakulang sa suplay tungod sa pagpanago og piyesa (hoarding), nag-usab-usab nga presyo, ug kulang nga kalidad sa mga kagamitan.
Gawas niana, nagpabilin nga babag ang taas nga paunang bayad (upfront cost) alang sa pagtaud niini nga kasagarang mas dako pa sa tinuig nga kita sa usa ka pamilya, samtang ang ubos nga pautang (loan) sa gobyerno alang sa solar wala gihapon naglakip sa mga trabahante sa pribadong sektor.
Photo courtesy: Philippine News Agency
