Gipalig-on sa Philippine Statistics Authority (PSA) Provincial Statistical Office – Davao del Norte ang kampanya alang sa mas lapad nga paggamit ug pagdawat sa National ID pinaagi sa pagbutang og mga informational sticker sa nagkadaiyang pampublikong transportasyon sa Tagum City niadtong Nobyembre 18, 2026.
Tumong sa maong inisyatiba nga mas mapahibalo ang publiko sa kamahinungdanon sa National ID isip opisyal nga pamatuod sa pagkatawo nga mahimong gamiton sa pagproseso sa nagkadaiyang transaksiyon.
Pinaagi sa pagbutang sa mga sticker sa mga pampublikong sakyanan, gilauman nga mas daghang pasahero ug komunidad ang maabot sa kampanya, ilabina sa pagpasiugda nga dawaton ang National ID sa mga opisina sa gobyerno, pribadong establisemento ug mga institusyong pinansiyal.
Giawhag usab ang publiko nga ipresentar ang ilang National ID sa mga transaksiyon aron mas mapadali ug mahimong hapsay ang pagproseso sa mga serbisyo nga nagkinahanglan og beripikasyon sa identidad.
Kabahin kini sa padayong paningkamot sa PSA DavNor nga mapalapad ang kahibalo sa publiko ug mapalig-on ang paggamit ug pagdawat sa National ID sa nagkadaiyang sektor sa katilingban.
Photo Courtesy: PSA Region XI Davao del Norte










