Mabungahon ang gipahigayon nga Tagum City Children’s Congress kagahapong adlaw sa buntag, Nobyembre 20, sa J.V Ayala Avenue, isip kabahin sa 34th National Children’s Month Celebration. Gisalmutan ang maong kalihukan sa mga estudyante ug kabataan gikan sa nagkadaiyang pampubliko ug pribadong tulunghaan ning siyudad sa elementerya ug high school.
Ubos sa tema nga “Manindigan, Tumugon at Kumalinga: Sa Batang Handa, Mas Ligtas ang Bansa,” tumong niini nga mahatagan og higayon ang mga bata nga mapalig-on ang ilang kahibalo sa ilang mga katungod ug mapalambo ang mas luwas ug inklusibong komunidad alang kanila.
Gipangunahan ang maong aktibidad sa City Social Welfare and Development Office (CSWDO) sa Lokal nga Panggamhanan sa Tagum. Mitambong sa maong kalihukan ug sa iyang suporta ang Committee on Gender Equality and Development, Children and Family Welfare and Social Services.
Ang LGU-Tagum, ilawum sa liderato ni Mayor Rey Uy, padayon sa pagpatuman ug pagpalig-on sa mga programa ug inisyatibo nga nagsiguro sa maayong kaugmaon ug luwas nga komunidad alang sa mga batang Tagumenyo.
Photo Courtesy: City Government of Tagum










