Posibleng mahimong pinakataas nga impeachment trial sa kasaysayan sa nasod ang paghusay ni Vice President Sara Duterte, sumala ni Senate Secretary Renato Bantug.
Base sa banabana sa impeachment clerk of court, mahimong moabot og pito ka bulan ang trial tungod kay tulo ka adlaw matag semana ang target nga iskedyul sa pagpaminaw sa kaso. Kini nga projection dako og kalahian kon itandi sa nangaging mga impeachment trial, sama sa kang kanhi Chief Justice Renato Corona niadtong 2012 nga nidugay lang og 44 ka adlaw, ug kang kanhi Pangulong Joseph Estrada niadtong 2001 nga niabot lang og 23 ka adlaw human nag-walkout ang mga prosecutor tungod sa isyu sa “second envelope”.
Ang pito ka bulan nga dagan sa paghusay naggumikan sa 92 ka trial days nga gipangayo sa House Prosecution Panel ug 30 ka adlaw nga gihangyo sa Defense Panel aron mapresentar sa isigka-habig ang ilang mga ebidensya ug mga testigo. Bisan pa niana, matod ni Bantug, dako pa ang posibilidad nga mapamubo kini nga proseso kon mas daghang testigo ang mapatubag matag adlaw sa husgado.
Tungod niining taas nga dagan sa pagdungog, usa kini sa mga nag-unang gipangandaman karon sa impeachment court. Kinahanglan matod pa nilang balansehon ang trial dungan sa ilang orihinal nga trabaho isip lehislatura, lakip na ang paghimo og mga balaod, pagpasa sa mga balaodnon, ug ang pagsusi sa panalapi sa nasod alang sa mosunod nga tuig.
Photo courtesy: East Asia Forum
