Nakasinati og pagsaka sa ilang operating costs ang daghang mga vendors sa Asya tungod sa padayon nga pagmahal sa presyo sa mga plastik nga produkto. Kini nga sitwasyon giingong resulta sa krisis sa enerhiya nga gipahinabo sa panagbangi sa Middle East.
Sa Taiwan ug Thailand, daghang vendors ang nagreport nga miabot og hangtod 60 porsyento ang pagsaka sa presyo sa mga plastic bags, trays, ug uban pang disposable containers. Tungod sa maong pagmahal, daghang mga negosyante ang napugos sa pagpakunhod sa ilang ginansya tungod kay nagduha-duha sila sa pagpataas sa presyo sa ilang mga baligya, aron dili mawad-an og mga kostumer.
Sumala sa mga eksperto, ang ethylene nga maoy nag-unang sangkap sa plastik naggikan sa naphtha, usa ka oil by-product nga kasagarang ginakuha gikan sa Gulf region.
Dinhi sa Pilipinas, gipahayag sa mga manufacturers nga naningkamot sila sa pagsagubang sa maong dugang gasto aron malikayan ang dakong pagsaka sa presyo sa ilang mga produkto, bisan pa nga direkta usab kini nga nakaapekto sa ilang kita.
Sa pagkakaron, padayon nga gibantayan sa mga negosyante ang dagan sa suplay ug presyo sa mga hilaw nga materyales samtang naghulat sa hingpit nga pag-normal sa merkado.
Photo Courtesy: EuP Egypt
