Gipasiugda ni Acting Deputy Chief sa Philippine National Police alang sa Administration, Police Lieutenant General Bernard Banac, nga ang tinuod nga kusog sa PNP dili lamang masukod pinaagi sa mga operasyon ug crime statistics.
Matod ni Banac, ang kalig-on sa organisasyon nag-agad sa moral nga karakter, mga prinsipyo, ug disiplina sa matag miyembro sa kapulisan, ilabi na sa panahon nga nagsul-ob sila sa ilang uniporme ug nagtuman sa ilang katungdanan.
Atol sa iyang pagbisita sa Zamboanga Sibugay, iyang gipasabot nga gawas sa pagpatuman sa mga polisiya ug operasyon, importante nga matagad sa PNP ang kaayohan sa ilang mga personnel, maayong pagdumala sa mga resources, ug pagpreserbar sa integridad sa organisasyon.
Sumala pa sa opisyal, ang maong mga prinsipyo maoy pundasyon sa pagsiguro nga magpabiling lig-on, propesyonal, ug kasaligan ang serbisyo sa kapulisan alang sa publiko.
