Gisuspinde sa Batangas City Integrated High School ang tanang klase ug mga kalihokan sulod sa eskwelahan sugod adtong Lunes, Hunyo 29, human makadawat ug hulga sa pagpamusil o shooting threat pinaagi sa ilang Facebook page. Ang suspensyon magpadayon hangtod adunay bag-ong pahibalo aron masiguro ang kaluwasan sa mga estudyante, magtutudlo ug ubang personnel sa eskwelahan.
Sumala sa Batangas City Police, ang hulga nag-ingon nga ang mga estudyante sa Grade 7 hangtod Grade 10 ang mahimong target. Ang mensahe gipadala gikan sa usa ka dummy Facebook account nga nagpaila nga Grade 10 student ug giingon nga biktima sa bullying.
Padayon karon ang imbestigasyon sa kapulisan aron mailhan ang naghimo sa maong paghulga. Nakigpulong usab ang kapulisan ug ang principal sa eskwelahan isip kabahin sa ilang koordinasyon aron mapalig-on ang seguridad ug malikayan ang posibleng insidente.
Gidili usab sa eskwelahan ang pagsulod sa ilang compound samtang epektibo pa ang suspensyon. Gipunting sa mga awtoridad ang maong hulga ilabina nga bag-o pa nahitabo ang insidente sa pagpamusil sa usa ka eskwelahan sa Tacloban City nga miresulta sa kamatayon sa tulo ka estudyante.
Photo Courtesy: Arsenio Dayot
