Nakab-ot sa Philippine Beach Handball Team ang usa ka makasaysayanong upset human gipukan ang powerhouse nga Brazil sa nagpadayong World Championships didto sa Zagreb, Croatia.
Giisip kini nga usa sa pinakadakong kadaugan sa kasaysayan sa nasod sa internasyonal nga entablado, diin napamatud-an sa mga Pinoy nga kaya nilang makigkompetensya ug mopildi sa mga higanteng nasod sa maong dula.
Si Mateo maoy nangulo sa opensa sa Pilipinas nga nakatigom og 16 puntos, samtang si Adriano miamot og 15 puntos, ug 11 puntos usab gikan kang Ong.
“Dako kaayo among kalipay nga nakadaog mi batok sa Brazil. Ang tanan nasayod nga sila ang paborito nga modaog batok kanamo, apan nakuha namo ang kadaugan,” pamahayag ni Head Coach Jana Franquelli nga puno sa emosyon human sa makasaysayanong dula.
Dugang pa ni Dr. Ernesto Jay Adalem, ang presidente sa Philippine Handball Federation (PHF) nga anaa didto sa Croatia, dako kaayo ang garbo nga gihatag sa koponan ug nakuha nila ang respeto sa internasyonal nga entablado taliwala sa pag-atubang sa mga magdudula nga mas tag-as ug mas dagko kay kanila
Photo Courtesy: Philippine Handball Federation, Inc.
