Tingkagol karon sa prisohan ang sa ka Top 2 Provincial Level Most Wanted Person human kini malampusong nadakpan sa mga personahe sa 2nd Surigao del Sur Provincial Mobile Force Company (SDS PMFC) niadtong Lunes, Hunyo 15, 2026.
Giila ang dinakpan sa alyas nga ‘Rey’, 50-anyos, minyo, usa ka mag-uuma, ug residente sa Purok 8, Barangay Libas Gua, lungsod sa San Miguel.
Sumala sa report, nahitabo ang pag-aresto mga alas 3:50 sa hapon pinaagi sa pagpatuman sa Warrant of Arrest ubos sa Criminal Case No. 10048-26 alang sa krimen nga Frustrated Murder. Ang maong warrant giisyu sa adlaw mismo sa pagkasikop niini, diin adunay girekomendang piyansa nga nagkantidad og ₱200,000.00 alang sa iyang temporaryong kagawasan.
Ang malampusong operasyon gihimo subay sa gipahugtan nga kampanya batok sa mga wanted person ug dungan sa pagpahigayon sa Simultaneous Anti-Criminality Law Enforcement Operations (SACLEO). Kini gipangulohan sa 2nd SDS PMFC ubos sa pagdumala ni Force Commander PLTCOL Nelson C. Nelmida gamit ang Target Intelligence Packet (TIP).
Photo courtesy: PNP 2nd Surigao del Sur Provincial Mobile Force Company
