Dul-an 30 ka pares nga sakop sa tribong Manobo gikan sa nagkalain-laing lungsod sa lalawigan ang opisyal nga naghiusa sa kaminyoon atol sa “Lumadnong Kasalan ng Bayan” nga gipahigayon karong adlawa sa Governor Vicente T. Pimentel Gymnasium sa Barangay Telaje, Tandag City.
Ang maong kalihokan kabahin sa pagsaulog sa ika-66 nga Adlaw sa Surigao del Sur, nga nagtumong sa pagpasidungog sa kultura ug tradisyon sa mga lumad samtang gipalig-on usab ang kahinungdanon sa pamilya ug kaminyoon.
Malipayon nga makita sa mga nawong sa mga bag-ong minyo ang ilang kalipay sa maong talagsaong higayon. Ang seremonya gipanalanginan ug gipangulohan ni Datu Jimmy Guinsod, Indigenous Peoples Mandatory Representative (IPMR) sa probinsya.
Gitambongan usab ang kalihokan sa mga opisyal gikan sa National Commission on Indigenous Peoples (NCIP)-Caraga, uban ni San Miguel Liga ng mga Barangay President ug Punong Barangay Gladys Mae Corilla, ug Konsehal Ruth Guinsod.
Mas nahimong mabulokon ang okasyon tungod kay sa wala pa ang opisyal nga seremonya sa kasal, gipahigayon una ang tradisyonal nga ritwal sa mga Manobo, lakip ang paghalad og baboy isip simbolo sa panalangin, pasalamat ug maayong kaugmaon alang sa mga bagong minyo.
Ang “Lumadnong Kasalan ng Bayan” usa ka pagpamatuod sa padayon nga pagpreserbar sa kultura sa mga lumad ug sa paghatag og legal nga pag-ilala sa ilang panaghiusa isip magtiayon.
