Ihatud na sa katapusang pahulayanan karong Miyerkules, Hunyo 24, ang batan-ong basketball star nga si Rene Clert Baterbonia sa bag-ong municipal cemetery sa Talacogon, Agusan del Sur. Si Baterbonia namatay human nalumos atol sa usa ka team-building activity sa Aurora kauban ang iyang teammate nga si Divine Adili nga pulos magdudula sa Ateneo de Manila University.
Ang sementeryo nga iyang pagalubngan gigamit kaniadto isip archery venue sa Palarong Pambansa, nga gihimo usab nga katapusang pahulayanan ni Baterbonia. Sa karon padayon ang pagdagsa sa mga lumulupyo ug mga supporter aron mohatag og katapusang pasidungog sa atleta nga nakahatag og dungog sa Davao ug Agusan del Sur.
Sa laing bahin, gipasidunggan si Baterbonia sa Datu Lipus Makapandong Award human sa iyang kamatayon isip pag-ila sa iyang nahimo ug dungog nga gidala sa Agusan del Sur
Pinaagi niini, nahinumduman sa tibuok Davao Region ang nahimong kontribusyon ni Baterbonia sa larangan sa basketball sa Palarong Pambansa niadtong 2025 lakip na ang iyang kontribusyon sa kadaugan sa Pilipinas sa ASEAN School Games.
Photo Courtesy: PEP.ph
