Gipalig-on sa Social Security System (SSS) Pagadian Branch ang ilang kampanya sa pagpalapad sa social security coverage pinaagi sa Palengke Caravan nga nagtutok sa mga vendors ug ubos nga hot-ong nga sektor sa katilingban nga sagad wala pa mapamiyembro sa SSS.
Sa pakighinabi sa Juander Radyo News Team, kang SSS Pagadian Branch Head Edwin Remoto, siya miingon nga daghan gihapon sa mga side walk vendor, self-employed workers ug gagmay’ng negosyante sa mga merkado ang wala pa marehistro isip miyembro sa SSS.
Matud pa ni Remoto, pinaagi sa caravan, giduol mismo sa ahensya ang mga trabahante sa informal sector aron mapadali ang ilang pagparehistro, pag-update sa rekord ug paghatag og kasayuran bahin sa mga benepisyong ilang madawat isip mga miyembro.
Gipasabot usab sa opisyal, nga bisan importante ang adlaw-adlaw nga pagpanginabuhi sa mga vendors, kinahanglan usab nilang hatagan og prayoridad ang ilang SSS membership tungod kay kini naghatag og proteksyon sa mga miyembro sa panahon nga kini gikinahanglang.
Naglaum usab ang opisyal sa SSS Pagadian, nga pinaagi sa Palengke Caravan, mas daghang vendors ug trabahante sa informal sector ang mahimong miyembro ug makabenepisyo sa social security program sa gobyerno.
