Gidayeg sa 1st Infantry Tabak Division, Philippine Army ang makanunayong papel sa media sa Zamboanga Peninsula sa paghatod ug tinuod ug kasaligan nga impormasyon ngadto sa publiko.
Kini subay sa gipaabot nga pahayag ni LTC Jimmy S. Sanz Chief sa G7, 1st Infantry Tabak Division atol sa media fellowship nga gihimo kagahapon, Hunyo 18, 2026 sa may Officer’s Clubhouse/ Tabak Pool, Tabak Division Ground.
Gipasiugda ni LTC Sanz ang importansya sa lig-on nga panaghiusa tali sa militar ug media aron mapalig-on ang pagsabwag sa husto ug responsableng impormasyon.
Matud pa ni Sanz, dako ang natampo sa media sa pagpahibalo sa katawhan sa mga kalihokan ug programa sa kasundalohan, ilabina sa pagbatok sa misinformation ug sa pagpalambo sa kalinaw ug kalamboan sa rehiyon.
Ang maong media fellowship kabahin sa padayon nga paningkamot sa 1st Infantry Tabak Division sa paglig-on sa maayong relasyon ug kolaborasyon uban sa media partners sa Zamboanga Peninsula.
